ডেইজী অনুৰঞ্জনা
.
যিবোৰ কথা বুজিব পৰা নাছিলোঁ
সেইবোৰ এতিয়া লাহে লাহে বুজিব ধৰিছোঁ
.
নুবুজা কথাবোৰৰ বাবেই
আমি এৰি আহোঁ আত্মীয়তা,
এৰি আহোঁ ৰিণি ৰিণি বাজি ৰোৱা
আপোনজনৰ বুকুৰ বহু কথা,
এৰি আহো ৰঙা হৈ জ্বলি ৰোৱা
সিপাৰৰ পুৰণি ঠিকনা!
.
এৰি অহা বাটত
নুবুজা কথাবোৰৰ বাবেই আৰম্ভ হয়
সঁচাৰ আঁৰৰ সঁচাবোৰ বিচাৰি নোপোৱাৰ নীৰৱতা;
আৰম্ভ হয় নকৰিবলগীয়া বহু কামেই কৰি
হেৰুৱাই অহা সময়ৰ ওভোটা খোজ!
যিবোৰ কাম কৰিব লগা নাছিল,
যিবোৰ কথা ক’ব লগা নাছিল…
.
এৰি অহা বাটতে নুবুজা কথাবোৰৰ বাবেই
আৰম্ভ হয় তাহানিতে ভাবিব নখোজা
বহু কথা আৰম্ভ হোৱাৰ নতুন বাট।
.
বুজা-নুবুজাৰো যে কি অবুজ খেলা
একেই কথা
একেই ভাষা
অথচ কি ভিন্ন আঁচোৰ
ভিন্ন ৰং!
.
নুবুজা কথাবোৰৰ বাবেই
বহু দিন মই তেওঁৰ চকুলৈ চাব পৰা নাই
চুই চাব পৰা নাই মোৰ বুকুত ৰৈ যোৱা
তেওঁৰ সেই শেষৰটো কথা।
কোনেওতো নুবুজিব
বুজি বুজিও নুবুজা হোৱাৰ যাতনা!
.
কথাবোৰ বুজিব পৰা হোৱাৰ পৰাই
মই চাব পৰা নাই নিজকো!
.
এনে কি আছিল নুবুজা কথাবোৰত?
যিবোৰ বুজি উঠাৰ পাছত
ঢুকি পোৱা নাই একোকে!
পূৰ্বৱৰ্তী পৃষ্ঠা পৰৱৰ্তী পৃষ্ঠা
