প্ৰশস্তি
নিৰু দত্ত
গুণ্ গুণকৈ আহিল ফাগুন
বন-বিৰিখেও ধৰিলে নাচোন ।
নাচোনত সৰিল পাত ৰঙা-হালধীয়া
ডালত ওলাব কুঁহি কোমল সেউজীয়া ।
ফাগুনত ফুলে নানা বৰণীয়া ফুল
ফুলে ফুলে উৰি পখিলা হয় মচগুল ।
ৰঙা মদাৰৰ পাহি নখত পিন্ধিম
ফুলৰ ৰেণুৰে গালত ফাকু সানিম ।
ভাল লাগে ধৰিবলৈ শিমলুৰ তুলা
চাবলৈ ভাল লাগে ফুলবোৰ ফুলা ।
পলাশৰ ফুলবোৰ যেন জুইৰ শিখা
নাচোতে মেলি দিয়া আঙুলিৰ লেখীয়া ।
ধূলিয়ে তৰিছে চন্দ্ৰতাপ আকাশৰ তলত
ভোঁ ভোঁ অলিয়ে চুমিছে আমৰ মলত ।
ধূলিৰ সাগৰত উৰিছে বাঁহপাতৰ চিলা
তাৰে এখনি থপিয়াই ধৰোগৈ ব’লা ।
ইৰিকতি মিৰিকতি বাঁহৰ শলা
অৰণ্যত বহিছে সৰাপাতৰ মেলা ।
সাজিছে নেজ লগা চিলা আমাৰ ধনখুৰাই
খোজোগৈ একোখনি নিজলৈ আহাচোঁ বেগাই ।
ইম্মান যে ভাল লাগে চিলা উৰাবলৈ
তাতোকৈ মজ্জা আনৰ চিলা কাটিবলৈ ।
চিচা গুৰিৰে খুৰাই জৰিত মাঞ্জা দিয়ে
জৰিৰ বাবে মাৰ তাঁতশালৰ ব চুৰি কৰে ।
ফাগুনে আনিছে শান্তি ধৰালৈ আমাৰ
কৰোনাক বিনাশি সাধিব মংগল সবাৰ ।
নিৰু দত্ত
সৰুপথাৰ-৭৮৫৬০১
৭০০২২৪১১৪৫
